- اسمك ايه.؟
- أنا فريال.. خامسة ابتدائي.
- أهلا فريال بس اسم كبير شوية..
- بابا سماني على اسم تيتة
- طيب، اقولك يا فيري ولا يا فرولة..؟ ...
- أي حاجة يا أونكل.
- وأنت؟
- سيد.. أولى اعدادي.
- أهلا أبو السيد Tough guy
- وانت..؟
- توفيق.. زميل فريال في الفصل.. خامسة ابتدائي برضو.
- أهلا تيفا..
مبدئيا أقوى واحدة فينا هي فراولة.. العلم بيقول كدة.. بيقول ان الست أقوى بيولوجيا (جسديا) من الرجل، ومتوسط عمر الست أكبر من الرجل ست سنين.. يعني الستات بتعيش أكتر وتقاوم أكتر.. ونسبة التخلف العقلي عند الرجل ضعف الست.. في الرجال 2 لكل 4000 وعند الست 1 لكل 4000.
ولما اتهزمنا سنة 67 ، أم كلثوم كان صوتها أقوى من الرئيس عبد الناصر يا ولاد.. سافرت فرنسا وغنت "أعطني حريتي أطلق يديا" على مسرح الألومبياد، فحركت قلوب الناس.. وبيونسية، مطربة البوب، أغنى مطربة في العالم بأجر 2 مليون دولار في الحفلة.. والرسول الكريم في أول البعثة لما كان بيستقبل الناس معلنين إسلامهم خصص يوم مستقل للستات..
يعني ليها إرادة منفصلة لتشارك في الحياة العامة، وتختار دينها ومعتقدها.. تبايع.. حاجة كدة زي الانتخابات اليومين دول.. في حين انها مخدتش الحق دا في بريطانيا إلا بعد الحرب العالمية الأولى 1920.
ورئيس البنك الدولي، كرستين لاجارد، واحدة ست.. وأقوى شخصية في أوروبا، انجيلا ميركل، ست.
يبأى تعظيم سلام لفراولة..
يقف توفيق غاضبا ويقول..
- بس أنا عازم فرولة على عصير برتقال بيتي، وواحدة هوهوز..
- هدي نفسك يا تيفا.. و بما أنفقوا من أموالهم.
هنا يتحدث أبو السيد..
- ليه يا أونكل محمد بشوف عندنا في الشارع ناس لابسه جلابية قصيرة. وأحيانا بيقولوا إنهم كدا شبه النبي محمد.. وان اللي مش هيعمل كدا هيخش النار.. دا صح؟
يبأى كدة تيفا هيعزمنا كلنا على برتقال وهوهوز.. الحكاية كبيرة وهنحكيها من أولها. وركزوا معايا.
*
يروي أبو ذر عن الرسول كما جاء في مسلم.. ثلاثة لا يكلمهم الله يوم القيامة.. المنان، الذي لا يعطي شيئا إلا منة، والمنفق سلعته بالحلف الكاذب، والمسبل إزاره"
وفي رواية البخاري عن ابن عمر، تحت باب، من جر ثوبه من غير خيلاء، أن الرسول عليه الصلاة والسلام قال، من جر ثوبه خيلاء لم ينظر الله له يوم القيامة
الإزار هو جزء من الملابس بيتلف حول الوسط يا ولاد.. كان زمان بدل البنطلون.
وفي أحاديث تانية، اللي يجر إزاره، يعني يطول ملابسه، تحت كعب رجله، ربنا هيدخله النار.
لكن هل معقول مجرد انك تطول بنطلونك أو جلابيتك شوية تدخل النار..؟ ينفع دا مع دين الرحمة ورسول الرحمة..؟ ولا الموضوع مختلف عن كدة..!
لاحظوا يا ولاد الحديث الأول.. الرسول عليه الصلاة والسلام ينبه لسلوكيات كريهة تفسد طباع الناس وتضر من حولهم.. المنان: شخص لا يفعل الخير إلا ليذل الناس ويتعالى عليهم، ويذكرهم بفضائله.. والمنفق سلعته بالحف الكاذب، يعني غشاش بيضحك على الناس ويكذب عليهم.. ثم المسبل إزاره، يعني مطول هدومه لدرجة إنها بتجرجر على الأرض تعاليا.
زمان كان الواحد لما يحب يعرف الناس إنه غني، يروح يفصل هدوم طويلة بتجر عشان يقول للي حواليه إنه معاه فلوس كتير ومبيهموش. بيتنطط عليهم يعني. بيرمي فلوسه على الأرض عشان يغيظ الناس.
يتحدث أبو السيد:
-بس دي طريقة هابلة أوي.. يعني إيه واحد لابس بنطلون طويل. عادي ما انا ممكن أشتري بنتاكور أو برمودا أغلى من بنطلونه الطويل.
-بالظبط يا بو السيد.. فعلا دي حاجة هابلة اليومين دول.. لكن المعنى موجود.. إن واحد يتعالى على الناس بمظهره.. مغرور ومتكبر وتعامله وحش.
-آه زي حازم ابن تانت ميرفت..
-بغض النظر عن تانت ميرفت وابنها.. بس آه زيه كدة.
-يعني أيام الرسول كان في ناس زي حازم..
-أيوه ..
-والرسول عايزنا منبأش زي حازم..
-تمام..
-طب كان أسهل إن الرسول يقول: يا جماعة محدش يبأى زي حازم ابن تانت ميرفت.
-لا، دا التفسير يا أبو السيد.. إنما الحديث ينفع له تفاسير كتير وفق الزمن.
نرجع للحديث يا ولاد.. شوفوا الكلام الحلو اللي فيه، اكتر ناس ربنا يغضب عليهم ولا ينظر لهم يوم القيامة.. واحد منان، بيتعالى على الناس بفلوسه وفضائله.. وواحد غشاش في تجارته وبيحلف كذب.. والتاني بيتفاخر عليهم بثيابه ومظهره.. يعني كلها معاصي في حق البشر.. وهي أكبر المعاصي التي تؤدي للهلاك.. حديث صغير زي دا ممكن يخلينا ناس أجمل. بعيدا عن الفهم الساذج بتاع الجلابية القصيرة الذي يضيع عظمة كلام الرسول ورقيه بفهم سطحي مشوه.
يعني الرسول بينهانا عن التمايز بناء على الشكل. بينما هو يلبس شيئ قصير ليتعالى علينا به باعتباره أكثر إيمانا.. قديما كانت المعصية بجلابية طويلة. الآن هو يرتكب معصية بجلابية قصيرة.
الرسول يقصد أن نحافظ على مشاعر الناس حتى في ملابسنا.. لا تجعلها وسيلة للتعالي أو الكبر أو الطغيان أو القهر.. من يرتدي ملابس فاخرة باهظة الثمن ليتعالى على الناس فلن ينظر له الله يوم القيامة. ونظرة الله رحمة ومغفرة. مجرد أن تتسبب في ألم نفسي لغيرك يحملك ذنب كبير.
الحديث يهدف إلى تهذيب النفس وترقيق القلب وتذويب الفوارق بين الناس. وإيقاظ الحس الانساني تجاه الآخرين. ويحملك مسئولية أخلاقية تجاه من تعايشهم.
زمان يا ولاد كان التعالي بحتة قماش طويلة تجر على الأرض.. و الآن ممكن تتعالى ببدلة إيطالية بـ 20 ألف جنيه أو ساعة سويسري بـ 5 آلاف جنيه أو حزام جلد انجليزي بـ 1500 جنيه.
كلام الرسول دا مش هتلاقوه في مجلس الشعب، ولا البرنامج الاقتصادي للدولة، ولا نصوص القانون.. المشاعر دي لن نجدها إلا في الدين.
وزي ما تيفا قال، إن البانتكور القصير ممكن يكون أغلى من البنطلون الطويل.. فممكن الثوب الطويل يمنح التواضع والثوب القصير – على خلاف النص – يمنح التعالي.. صح؟
صح..
الإسلام يهذب شهوات الإنسان وميله الفطري للتعالي والسرف، بل القرآن صب غضبه على المسرفين.. (إن الله لا يهدي من هو مسرف كذاب) سورة غافر.. (ولا تطيعوا أمر المسرفين) سورة الشعراء.
يعني مهما كنت غني لازم تكون متواضع.. ومهما كان غيرك ضعيف لازم تكون رحيم.. ومينفعش تضيع فلوسك في شيء غير مفيد حتى لو مجرد حتة قماش زيادة.. لإن الإسراف سبب هلاك كتير من الأمم.
هضربلكو مثال بأمريكا.. أكبر وأغنى دولة في العالم.. اليومين دول أمريكا أصبحت أكبر دولة مدينة في العالم.. يعني أكبر دولة عليها ديون (16 تريلون دولار). ولو الكونجرس معدلش القانون وسمح بسقف أعلى للديون، الحكومة الأمريكية هتعلن إفلاسها .. تخيلوا..
وكرستين لاجارد مديرة البنك الدولي، بتقول إن دي هتبأى أكبر كارثة في القرن العشرين. البيت الأبيض – قصر الرئاسة – بدأ يقلل عدد الموظفين إلى الربع، والجهاز الحكومي على وشك التخلص من مئات الآلاف من العاملين لإن مفيش مرتبات.
رغم إن أمريكا فيها 400 ملياردير معاهم فلوس توازي الوطن العربي كله في سنة (2 تريليون دولار) لكن الأغنياء دول بيضيعوا فلوسهم على ملابس فاخرة، تعاليا وكبرا، زي الناس اللي الرسول اتكلم عنهم من 1400 سنة في الحديث. وإن اختلفت الصور. و هي دي الرأسمالية. ناس تتفصل من شغلها وناس معاها مليارات.
أما الإسلام، فلو أساء الغني استخدام ثروته في ملابس فاخرة للتعالي، يستحق العذاب..
في أجمل من كدة يا فرولة؟
عشان كدة تلاقي عالم كبير، وهو الحافظ بن حجر العسقلاني، في فتح الباري لشرح البخاري، يقول أن الحديث خاص بمسبل ثوبه خيلاء. وقيد الأحاديث العامة التي تتحدث عن إلإسبال مثل (ما أسفل الكعبين من الإزار فهو في النار) بالحديث الخاص بالكبر والخيلاء.
والعالم العظيم النووي في شرح أحاديث مسلم قال نفس الكلام. وقيد جر الإزار بحديثين واضحين:
(من جر إزاره لا يريد بذلك إلا المخيلة فإن الله لا ينظر إليه يوم القيامة)
(لا ينظر الله إلى من جر إزاره بطرا)
والمخيلة هي الكبر.. والبطر هو الطغيان.. وهي دي الصفات المقصودة في الأساس والمعاقب عليها. أما مظاهر هذه الصفات فتختلف باختلاف الزمن.
وعشان كدة تلاقي أبو بكر لما سمع الحديث قال للرسول، إن إزاري يسقط مني، وإني أتعهده.. فيقول الرسول له ليطمأنه: "لست ممن تفعلها كبرا".. واضح طبعا إن دي كانت وسيلة للتكبر عند العرب.
كمان الرسول كان إزاره يسقط منه ويجره أحيانا.. ففي فتح الباري، أنه خسفت الشمس فقام الرسول يجر ثوبه مستعجلا حتى أتى المسجد.
*
النهاردة كام في الشهر يا أبو السيد..
6 أكتوبر..
زي النهاردة سنة 1898 اتولد توفيق الحكيم. كاتب روائي مصري عظيم. ونفس السنة يا ولاد اتولدت أم كلثوم. والموسيقار محمد عبد الوهاب. وكان طه حسين والعقاد عندهم 9 سنين و سيد درويش 6 سنين.. أطفال زيكم كدة.. وكان الشاعر أحمد شوقي شاب عنده 30 سنة زيي كدة.
مش مهم تعرفوا تفاصيل عن حياتهم، لكن لما تكبروا اعرفوا ان دول ناس عظماء لازم نكون زيهم واحسن شوية. سواء لابسين بنطلون طويل أو بنتاكور قصير..
للتواصل مع الكاتب عبر الفيس بوك
ليست هناك تعليقات:
إرسال تعليق