في محل ملابس رياضية شهير:
- تعرفي إن السباحة الاسترالية آنيت كيلرمان كانت أول ست تلبس "بيكيني" في العالم. في مدينة بوسطن بـ أمريكا.. سنة 1907 .. وقتها تم القبض عليها ومحاكمتها بتهمة الابتذال وعدم الحشمة.
- ايه دا بجد . هو العالم كان متخلف اوي كدة لحد فترة قريبة.. كانوا عايشين ازاي من غير بيكيني..!
...
- أكيد كانوا بيلبسوا مايوه شرعي شبه بتاع داليا.
- على فكرة صح.. هما كانوا بيلبسوا مايوه شبه المايوه الشرعي قطعة واحدة كبيرة مغطية الجسم كله.. لكن بدأوا يقللوا حجمه مش عشان التحرر. لا . عشان بعد الحرب العالمية التانية كانت في أزمة في المنسوجات.. فقالوا يصغروه شوية..
- إيه الاستهبال دا..
- طب تعرفي إن أول بكيني كان سنة 1946 والافندي اللي صممه كان مهندس راح عمل بيه براءة اختراع.
- الصراحة هو اختراع..
- و لا واحدة كانت تجرؤ تلبسه وقتها.. تعرفي هما سموه بيكيني عشان جربوه الأول في جزيرة في المحيط اسمها بكيني . الجزيرة دي اللي امريكا عملت فيها اختبار القنبلة الذرية.. عشان كدة سموه الأول القنبلة الذرية..!
- من حيث القنبلة هو أحيانا بيبأى أقوى.
- ولحد 1950 كان ممنوع في دول أوروبا.. الفاتيكان كان بيقول حرام!
- ليه هو الشيخ عبد الله بدر كان جايب عقد عمل في الفاتيكان..؟
ثم تنظر للبائعة وتقول: ممكن الأزرق من دا..
وهنا تدخل فتاة أخرى وتسأل البائعة بهدوء:
ممكن مايوه شرعي !
للتواصل مع الكاتب عبر الفيس بوك
ليست هناك تعليقات:
إرسال تعليق