ممنوع لأقل من 18 سنة
هي : بتدخن ؟
أنا : غالبا لا ..
هي : انا كمان بكره التدخين , بس السيجارة هي ملاذي الاخير ..
انا عندي تليف في الكبد , ومفروض التدخين مضر بالنسبة لي .. وجوزي من يوم ما الشركة اللي شغال فيها قفلت واحنا طول النهار نتخانق على أهيف حاجة .
لازملي عملية زرع .. هههههه .. في ناس بتقول زرع الاعضاء حرام .
أنا : السعودية تبيح زرع الاعضاء رغم انها دولة مسلمة متشددة .
هي : لو حد فيهم جرب الوجع كان هيبطل يفتي بكلام فارغ .
هو ايه لازمة الحكومة طالما سايبانا مرضى كدة .. ايه لازمة ولاد الوسخة اللي بيفتوا في الفضائيات عن بول الابل .. ايه لازمة الديمقراطية وانا مبعرفش اشرب كباية شاي الصبح وممنوعة من الخلفة .
كل مرة بشوف حد من السياسيين بيتكلموا أو حد من الاحزاب الاسلامية اللي طالعة جديد بكون عايزة اقوم اشخرلهم .. كلهم أغنيا .. كلهم بيتعالج بره مصر .. كلهم عايش في قصور .. وأدام الكاميرا أعداء وورا الكاميرا حبايب .
السلفيين وشفيق طلعوا متفاهمين .. والاخوان كانوا بينسقوا مع عمر سليمان .. وابو اسحاق الحويني لما تعب بالكبد سافر المانيا .. وحسني مبارك فضل في المركز الطبي العالمي اكتر من سنة ونص بعد الثورة .. وانا عايزة 12 الف جنيه اعمل العملية مش لأياهم .. وكل يوم اتخانق انا وجوزي على علبة السجاير .. أحا .
آخر مرة جالنا مزاج انا وجوزي نعمل sex من حوالي شهر ونص , وبعد ما خلعت هدومي جالي مغص جامد وفضلت أعيط وهو فضل يعيط جمبي .. محصلش حاجة .. بس كان شكلنا يصعب ع الكافر والله .
عرايا .. فقراء .. مرضى .. وبنبكي .. محدش واخد منها حاجة .
انا بفكر اروح الكنيسة أتنصر يا دكتور يمكن يعملولي العملية .. ايه رأيك ؟؟
انا مؤمنة بربنا وانه بيبتلينا عشان يخفف ذنوبنا ويكافئنا في الجنة .. هتفرق ايه بأه كنيسة من مسجد من معبد فرعوني .. المهم يكون قلبك مؤمن بربنا وانك متكفرش بيه .. كلهم عايزين يكفروني بس انا مش هكفر .
أنا : انتي ماسكة السيجارة من ربع ساعة ومخدتيش منها ولا نفس ..
هي ( تنظر الى السيجارة في أسى وتبتسم بمرارة ) : انا اصلا بكره السجاير بس اعمل ايه .. دا الشيء الوحيد اللي اعرف اخد فيه قرار واسيطر عليه .. إني اولع سيجارة .
أنا : في قرارات علاج على نفقة الدولة .. حاولي طيب .
هي : عمليات الزرع مش تبع قرارات العلاج .
ثم تكمل :
تعرف كنت مرة أدام مستشفى الجهاز الهضمي مستنية دوري ودخل رئيس المستشفى , كان راكب عربية تمنها يعالج كل الناس اللي واقفة دي .. رغم انه لو تبرع بتمنها يقدر يشتري واحدة تانية في ست شهور من دخل العيادة .. دا كشفه بـ 300 جنيه والمستعجل بـ 500 !!
*
وانا مروح كان موكب الريس معدي من شارع القصر العيني .. سيارات مرسيدس ضخمة مصفحة وسيارات دفع رباعي للحراسة وموتسيكلات .
سألت نفسي هو الريس راكب عربية مصفحة ليه ؟؟ عمر الرئيس ما اتضرب عليه رصاص وهو ماشي في شوارع مصر من أيام الملك فؤاد وانتهاء بحسني مبارك .
وبعدين حتى لو كان الريس معرض للموت مرة واحدة , فكل المصريين معرضين للموت في اليوم الوحد ألف مرة .. أليس من العدل أن يشاركنا ذات المصير .. النبي كان بيحارب مع الصحابة وكان على وشك القتل عدة مرات .. والخليفة عمر كان بينام في الارض في الشارع , وعمر بن عبد العزيز كان بيته بينور بشمعة واحدة على نفقته الخاصة , وعبد الناصر كان بيشوف الغارات الاسرائيلية من فوق سطح بيته .
والوزرا في الدول "الكافرة" بيركبوا المترو والاتوبيس .
هما خايفين على نفسهم أوي كدة ليه .. كلها موتة والسلام .. إما شهيد أو رعديد .
*
أحمد رمزي الممثل , الله يرحمه , بيحكي انه مرة كان ماشي في شارع الهرم بسيارته ومعاه عمر الشريف وحاولوا "يزنقوا" على سيارة معدية من جوارهم .. وكادت أن تحدث مشاجرة .. ففوجئوا ان قائد السيارة هو الملك فاروق !! وحده دون حراسة أو خفر !!
وأحمدي نجاد لحد فترة بسيطة كان بيركب سيارة بيجو 504 موديل 80 وبيقعد قدام ومعاه حارس واحد .. وبينزل يروح الشغل في ديوان الرئاسة ومعاه كيس السندوتشات اللي مراته عملاها في البيت عشان ميكلفش الدولة قرش صاغ .
*
وأثناء مروري في شارع القصر العيني , عبرت أمام مجلس الشعب المغلق وتذكرت أن نواب مجلس الشعب , ذوي الاغلبية الاسلامية , في شهور قليلة استهلكوا من بوفيه مجلس الشعب أكل بمئات الألوف , ومن صيدلية المجلس أدوية - خاصة الفياجرا - ببضعة ملايين , غير القروض الميسرة بدون فائدة .
*
لازم آكل شوكليت كيك حالا واشرب قهوة دبل .. بدل ما اشرب جاك دانيلز .
ليست هناك تعليقات:
إرسال تعليق