- انت سلفي ؟
- ايوه
- يعني ايه ؟
- يعني بتبع السلف
- جميل .. لكن أكتر من 99% من تفاصيل حياتنا مختلفة عن حياة السلف . احنا عندنا كهربا وبنزين ومصانع وتكنولوجيا حديثة ومنظومة تعليم وصحة غير السلف . هتتبعهم في إيه بالضبط ؟
- في فهمهم للدين
- طب ما الحاجات اللي فاتت دي هي الدين ! و إذا كان الرسول نفسه لم يفسر القرآن . عشان يفضل القرآن ملك للجميع ويمنع الكهنوت . وربنا يسر القرآن للذكر . وأمرنا بالتدبر والعقل والإبصار . وكلها أوامر فردية لك ولا علاقة لها بالسلف . وبعدين هو احنا بنعبد السلف ولا بنعبد ربنا ؟
- بنعبد ربنا طبعا
- طب وهو السلف معصومين ؟
- لا
- طب ازاي تتبع بشر غير معصوم ؟؟
- ..
- السلف اصلا اختلفوا .. الصحابة والتابعين واصحاب المذاهب الاربعة والثمانية . يعني منهج السلف هو التنوع والاختلاف والاجتهاد .
هل انت قرآني ؟
- اعوذ بالله , لا ..
- يا نهار اسود يعني لما انسبك للسلف اللي هما افراد في النهاية تحس بالفخر ولما أنسبك للقرآن الكريم اللي هو أعظم ما لدينا تتخض وتتبرأ منه. دا هوس على فكرة !
- السلفية هي قرآن وسنة بفهم سلف الأمة.
- تمام . طب تعرف إن كلمة "سلف" لم ترد في القرآن إلا مرة واحدة من باب الذم في سورة الزخرف . الآية 56 ( فلما آسفونا انتقمنا منهم فأغرقناهم أجمعين . فجعلناهم سلفا ومثلا للآخرين ) .
يعني كلمة سلف كلمة سيئة السمعة في الإسلام.
حتى الكفار لما رفضوا دعوات الرسول ، احتجوا باتباعهم للسلف وقالوا : هذا ما ألفينا عليه آباءنا الأولين. يعني من يصر على اتباع آبائه دون النظر إلى واقعه ضل ضلالا بعيدا .
- بس الشيخ ( ... ) يعرف أكتر مني .
- لا كهانة في الإسلام . ولن نفعل كبني اسرائيل نعبد الأشخاص من دون الله. وبعدين إزاي تفهم حديث الرسول: استفت قلبك ولو أفتاك الناس وأفتوك ؟ والرسول قال في حديث آخر : الإثم ما حاك في صدرك وخشيت أن يطلع عليه الناس . وقال ، التقوى ها هنا وأشار إلى قلبه.
وكلها أمور فردية لها علاقة بالضمير والعلاقة الفردية بينك وبين ربك من دون وسيط سلفي .
أضف لذلك . لو أن الفقهاء القدامى كانوا اتبعوا السلف لما ابدعوا لنا كل هذا التراكم المعرفي والثراء الفكري منذ القرون الأولى . لأنهم لم يكونوا سلفيين فقد تحرروا وفكروا واجتهدوا وأبدعوا .
تعرف الإمام الشافعي ؟
- ايوه أعرفه .
- تعرف إنه تتلمذ على إيد الامام مالك سنوات . وبعد كدة انفصل عنه , وأول كتاب ألفه كان اسمه، اختلاف مالك .. ورصد فيه خلافاته الفقهية والفكرية مع الإمام مالك . مكنش سلفي يعني .
طب تعرف عبد الله بن عباس ؟
- ايوه
- سمعهم يتحدثون بحديث تحريم أكل كل ذي ظفر وناب ، ولم يأخذ به .
عارف ليه ؟
- ليه ؟
- عشان قال حسبكم كتاب الله وما فيه ، وتلى لهم، ( وقد فصل لكم ما حرم عليكم ) .. ولم يحرم إلا الأصناف العشرة الواردة في سورة المائدة . الميتة والدم ولحم الخنزير والمنخنقة والموقوذة والمتردية والنطيح .. الخ.
أفهم من كدة إن ابن عباس كان قرآني ؟
- يا عم متلخبطنيش
- ألخبطك ليه هو دا التراث بتاعنا .
- طب كفاية كدة ومتكركبليش عقلي . أنا كدة حلو
- ههههه انت حلو .
- سلام
- سلام .. أوعى تبأى سلفي تاني .. عشان حرام !
للتواصل مع الكاتب عبر الفيس بوك
ليست هناك تعليقات:
إرسال تعليق