أبنوب ابن عم جرجس الترزي

- إيه يا عم النضارة الكبيرة اللي انت لابسها دي! 

- أنا اللي مختارها. شبه بتاعة دانيال رادكليف. بطل فيلم هاري بوتر، حلوة؟
- انت اللي حلو .. أخبار ماريان إيه؟
- ماريان مين؟
- متصعش، أكيد في ماريان وأكيد بتشوفها وانت رايح درس الانجليزي
- يا عم انا بتكسف أكلم البنات.

- نفسك تدخل كلية إيه يا أبنوب ؟
- أي كلية تخليني اشتغل. أنا مش عايز أقعد في البيت. أخويا الكبير خلص كلية وقاعد في البيت مش لاقي شغل.

- انت في سنة كام ؟
- تالتة اعدادي
- بتحب المدرسة ؟
- مش قوي. العيال لما بتتخانق معايا بيقولولي يا كفتس. يا اللي ريحتكوا وحشة. مع اني بستحمى عالطول والمسيح!
- انت في مدرسة إيه ؟
- السعيدية
- طب تعرف سبب الإسم ؟
- لا
- على اسم الخديوي سعيد . تعرف ان كان راجل كويس؟
- لا .. كويس ليه؟
- دا أول واحد يعطى المصريين حق تملك الأرض .

- يعني إيه؟

- زمان، كانت الارض والبشر والشجر والحجر ملك الخديوي أو الحاكم. وكل الناس شغالة عنده. الخديوي سعيد عمل اللائحة السعيدية وملك الفلاحيين المصريين الأرض. و ألغى الجزية عن المسيحيين.

- يعني إيه الجزية ؟

- أضربلك مثال. يعني مثلا أوصلك كل يوم المدرسة وأخد منك مرتب آخر الشهر . ولو انت حبيت تروح المدرسة لوحدك يبأى متدفعش المرتب . الفارق ان الجزية كانت عشان الحماية . يعني المسلمين هما اللي يحاربوا والمسيحيين يدفعوا مساهمة في الحرب.

- طب ما احنا ممكن نحارب برضوا .

- ودا اللي عمله الخديوي سعيد؛ سمح للمسيحين بدخول الجيش وأسقط الجزية. وعمل مواطنة ومساواة بين المصريين.
- ؟!
- تعرف الخديوي اسماعيل جاء بعده عمل إيه ؟
- لا ..
- أعطى للمسيحين 1500 فدان للإنفاق من ريعها على المدارس ودور العبادة المسيحية.
- الخديوي اسماعيل كان مسيحي ؟!
- ههههههه . لا طبعا ، كان مسلم ، دي كانت خلافة إسلامية .. وتعرف انه عين المسيحيين في المحاكم، وعينهم في أول مجلس شعب مصري سنة 1866 وكان اسمه مجلس شورى النواب. وبدأ يظهر مفهوم كبير اسمه "الأمة المصرية" تمييزا عن الأتراك والأرمن.

طب منفسكش تبأى رئيس وزارة يا أبنوب؟

- لا ياعم المسيحيين مش بيمسكوا المناصب الكبيرة دي.
- مش صح يا أبنوب . أول رئيس وزارة في مصر كان نوبار باشا . مسيحي . كان رئيس النظار.
- بجد ؟!
- آه والمصحف .. و تعرف إن أول برلمان بعد دستور 23 كان رئيسه مسيحي، إسمه ويصا واصف.
- طب والمسلمين كانوا فين ؟!
- المسلمين هما اللي عينوه !
- طب ينفع نروح نعيش مع المسلمين دول . أحسن من اللي بيقولوا عليا معفن . وبعيط ومش بقول لبابا !
- المشكلة في الناس، مش في الدين يا أبنوب.
- هو انت اسمك ايه ؟
- محمد ..
- انا بحبك والله يا عمو محمد . وكان نفسي الأستاذ عماد بتاع الدراسات يشرحلنا التاريخ حلو كدة . عشان انا اصلا مش بحب التاريخ .

- لازم تعرف تاريخ بلدك يا أبنوب زي ما انت عارف الشارع اللي انت ساكن فيه، وزي ما انت عارف طريق بيتك . وزي ما هتعرف ماريان وهتحبها .

تعرف مثلا إن الخديوي عباس حلمي التاني كان عايز يعين تيجران باشا، المسيحي، رئيسا للوزراء . عشان كان كفء وبيحب وطنه وضد الانجليز . في حين إن كرومر كان عايز يعين رياض باشا، المسلم، المهادن!

- هو الخديوي عباس كان مسلم ؟
- أيوه .
- وكان بيحب المسيحيين ؟
- أيوه .
- طب ينفع يبأى هو رئيس الجمهورية ؟
- هههه
- هو حضرتك مسلم ؟
- ايوه
- طب شايفني معفن ؟
- ههههه . لا . يا أبنوب قولتلك المشكلة مش في الدين المشكلة في الناس. هجيبلك صورة واحد هتحبه عشان تعلقها عندك في أوضة النوم . اسمه اللواء فؤاد عزيز غالي قائد الكتيبة 18 مشاة في حرب العاشر من رمضان . وهو اللي حرر القنطرة شرق ودمر القوات الإسرائيلية . وكان مسيحي , أسمر , مصري .. زيك!

تعالى نتصور .

- تعالى

- بس قبل ما نتصور أوعدني إنك تبأى رئيس وزارة ..

*
ثم يلمع الفلاش .